Тараққиётимиз кафолати қонунийлик ва соғлом рақобатда
“Ватан учун, миллат учун, халқ учун” шиори остида нишонланаётган Мустақиллигимизнинг 34 йиллиги арафасида Давлатимиз раҳбарининг “Бир ҳақиқатни унутмаслигимиз лозим: ҳар бир соҳа, ҳар бир ҳудуд, ҳар бир маҳалла – фақат тадбиркор ҳаракат қилганида, уларга қулоқ тутиб, ишонч билдирилганида ривожланади, обод бўлади”, деган гаплари том маънода байрам совғаси бўлди.
Соҳибқирон бобомиз Амир Темурнинг “Азми қатъий, тадбиркор, ҳушёр, мард ва шижоатли бир киши минг-минглаб тадбирсиз ва лоқайд кишилардан афзалдир”, деган таъкидлари бугун Янги Ўзбекистон ислоҳотлари мисолида ҳам ўз исботини топяпти.
Тан олиш керак, сўнгги йилларда мамлакатимиз тараққиёти, истиқболини таъминловчи асосий куч сифатида қаралаётган тадбиркорларга бўлган муносабат бутунлай ўзгарди. Уларнинг муаммолари, мурожаат ва таклифларини эшитиб, самарали ечим топиш тизими яратилди. Ортиқча текшир-текширишлар, чекловлар, бюрократик тўсиқларга барҳам берилди. Илк очиқ мулоқотдан буён тадбиркорларнинг мингга яқин ташаббуси қонунчиликка киритилди.
Қайд этилишича, тадбиркорлик субъектлари сони 2017 йилда 275 мингтани ташкил қилган бўлса, 2024 йилда бу рақам 456 мингтага етди. Бугун ишли аҳолининг 11 миллиони, яъни 74 фоизи айнан шу соҳада хизмат қилмоқда. Биргина жорий йилнинг ўзида 3 миллиондан зиёд иш ўрни очилди. Ялпи ички маҳсулот ҳажмининг ярмидан кўпи, саноат ва экспортнинг учдан бир қисми ҳам бизнес вакиллари ҳиссасига тўғри келмоқда.
Бу каби натижаларнинг барчаси тадбиркор ишига ҳеч ким аралашмайдиган даражада ҳуқуқий асос ишбилармонликка оид камчиликлар “кабинет”ларда эмас, очиқ мулоқотлар орқали ҳал қилинадиган тизим яратилгани билан боғлиқ. Яъни, Ўзбекистонда “Текширса – қўрқади, қўрқса – солиқ тўлайди”, деган қараш билан иш юритиб бўлмаслиги амалда исботланди.
Тадбиркор ҳам “сояда” ишлашдан кўра қонуний фаолият кўрсатишни, фақат соғлом рақобат муҳитигина манфаатли, фойдали бўлишини тушуниб етди. Натижада 139 мингта корхонада иш ўринлари 811 мингтага кўпайди, 273 мингта корхона иш ҳақи фондини 22 фоизга оширди. Ўтган йили хусусий секторда ўртача ойлик 4 миллион сўмни ташкил қилган бўлса, бугунги кунда 5 миллион сўмга яқинлашди.
Бу жараёнда эса энг аввало, барча даражадаги депутатлар Давлатимиз раҳбари томонидан бу борада илгари сурилган таклиф ва ташаббуслар ижросини таъминлашга, қонунчилик асосларини янада такомиллаштириб, тадбиркорлар манфаатини ҳимоя қилишга масъуллар. Зеро, Янги Ўзбекистон тараққиёти, истиқболини таъминлайдиган, давлатимизни бой қиладиган, энг асосийси, халқимиз, оилалар ҳаётини фаровон қиладиган куч бу – тадбиркорлардир.
Гўзал САМИЕВА,
Олий Мажлис Қонунчилик палатаси депутати,
Тадбиркорлик, рақобатни ривожлантириш ва саноат масалалари
қўмитаси аъзоси
