Туризмни ривожлантириш борасидаги янги қадамлар
Президентимизнинг тадбиркорлар билан навбатдаги учрашувида биринчи мулоқотдан буён тадбиркорларнинг мингга яқин ташаббуси қонунчиликка киритилгани айтилди. Бу галги, яъни бешинчи мулоқотга тайёргарлик давомида 26 та соҳанинг 7 мингга яқин вакиллари билан учрашувлар ўтказилгани, “колл-марказ” орқали ҳам 13 мингдан зиёд мурожаат ва ташаббуслар қабул қилингани таъкидланди.
Ўтган ҳафтада эса Давлат раҳбари раислигида яна бир муҳим мавзу – иқтисодиётимизнинг муҳим тармоқлари бўлган мева-сабзавотчилик, тўқимачилик ва якка тартибдаги тадбиркорлик масалалари муҳокама қилиниб, зарур кўмак чоралари белгилангани айтилди. Мулоқот давомида тадбиркорликнинг бошқа йўналишлари бўйича ҳам бир қатор янги ташаббуслар илгари сурилди.
Хусусан, йил бошидан юртимизга 7 миллионга яқин хорижий сайёҳ ташриф буюргани, 15 миллион аҳоли мамлакат бўйлаб ички саёҳатга чиққани ва келгуси 3-4 йилда хорижий сайёҳларнинг йиллик оқими камида 15 миллион нафарга етиши, шу боис туризмни ривожлантириш бўйича янги дастур бошланиши таъкидланди.
Ушбу дастур доирасида, келгуси уч йилда меҳмонхона ва туризм масканларини ташкил қилиш учун жами 5 минг гектар ер аукционга чиқарилиши, бунда меҳмонхона қурмоқчи бўлган тадбиркорлардан ерларни сотиб олиш учун тўлов ундирилмай, эвазига давлат шу сумма билан лойиҳага улушдор бўлиб кириши маълум қилиндики, бу шубҳасиз, соҳа ривожига бўлган юксак ишончдан далолатдир.
2026–2028 йилларда тижорат банклари томонидан барча тоифадаги тадбиркорлик субъектларига меҳмонхона қуриш учун вилоят марказлари, Тошкент ва Нукус шаҳарлари, туризмга ихтисослашган туман (шаҳар)ларда қурилаётган меҳмонхоналар учун – 30 миллиард сўмгача, бошқа ҳудудларда – 10 миллиард сўмгача 7 йил муддатга 2 йиллик имтиёзли давр билан кредитлар ажратилиши ҳам кўрсатиб ўтилди.
Ҳар йили сайёҳларнинг энг кўп эътиборини қозонган ва нуфузли халқаро платформаларда ижобий эътироф этилган жойлаштириш воситаларини аниқлаш ва тақдирлаш бўйича мукофот жамғармаси 1 миллион АҚШ долларига тенг танлов ўтказилиши ҳам айни муддаодир.
Янги меҳмонхона учун кўзда тутилган субсидиялар давлат объектлари ва хусусий биноларни сотиб олиб, уларда ташкил этилган меҳмонхоналарга ҳам берилиши, Тошкент шаҳри, вилоятлар маркази ва йирик сайёҳлик ҳудудларидан бошқа жойлардаги меҳмонхоналар туристик йиғимдан озод этилиши бизнес вакилларига катта имконият ва рағбатдир.
Ўйлаймизки, юртимизда тадбиркорликни ривожлантириш борасида амалга оширилаётган ислоҳотлар, бизнес вакиллари учун яратиб берилаётган имкониятлар Янги Ўзбекистон тараққиётини, истиқболини таъминлашга, давлатимизни бой қилишга, халқимиз, оилалар ҳаётини фаровон қилишга хизмат қилади.
Жуманазар ОТАЖОНОВ,
Олий Мажлис Қонунчилик палатаси депутати
