Буюк Британиянинг Лондон шаҳрида шахматнинг рапид ва блиц йўналишлари бўйича поёнига етган жамоалар ўртасидаги жаҳон чемпионати мухлисларга “ақл гимнастикаси”нинг олам-олам завқини туҳфа этган бўлса, иштирокчилар учун нуфузли турнирлар олдидан катта тажриба, маҳорат майдони бўлди.
Кеча чемпионатнинг сўнгги кунида блиц йўналишида 1/8 финал ўйинлари билан бошланган баҳсларда 16 та жамоа совринли ўринлар йўлидаги курашни давом эттирди.
Нодирбек Абдусатторов, Жавоҳир Синдоров, Рустам Қосимжонов, Нодирбек Ёқуббоев, Гулруҳбегим Тоҳиржонова, Нилуфар Имомқўзиева, Афруза Ҳамдамова, Шамсиддин Воҳидовдан иборат “Uzbekistan” жамоаси 1/8 финалнинг илк ўйинини Қозоғистоннинг Barys.kz (https://barys.kz/) жамоасига қарши ўтказди ҳамда иккита қарама-қаршилик натижасига кўра, 1/4 финал босқичига чиқди. Ушбу босқичда ҳамюртларимиз Ниҳал Сарин етакчилигидаги Исроилнинг “Ashdod Elit Chess” жамоасидан устун (3:3, 5:1) келди.
1/2 финалда Александр Гришук бошчилигидаги Қозоғистоннинг “KazChess” жамоасига рўбарў келди. Илк ўйинда 3:3 ҳисобида муроса йўли танланди. Иккинчи баҳсда 4:2 ҳисобида қўшниларимиз устунликка эга бўлди ва финал йўлланмасини қўлга киритди.
Ҳамюртларимиз 3-ўрин учун Левон Аронян етакчилигидаги “Hexamind” жамоаси билан куч синашди. “Hexamind”га қарши кечган ўйиннинг ҳар икки партиясида 2,5:3,5 ҳисобида имконият бой берилиб, 4-ўрин билан кифояланди.
Чемпионатда 116 нафар гроссмейстерни жамлаган 52 та жамоа орасида “Uzbekistan” рапид ва блиц йўналишларида 4-ўринни эгаллаши ўзига хос кўрсаткич бўлганини таъкидлаш лозим.
Мусобақалар якунларига кўра, шахматчиларимиз рапид баҳсларидан 30 минг, блиц йўналишидаги иштироки орқали 50 минг миқдоридаги мукофот билан тақдирланди.
Жаҳон чемпионати якунларига кўра, “WR Chess” жамоаси чемпионликка эришган бўлса, “KazChess” жамоаси кумуш, “Hexamind” жамоаси бронза медалига эга бўлди.
